సీబీఐ డైరెక్టర్ పదవీకాలం మరోసారి పొడిగింపు.. తీవ్రంగా వ్యతిరేకించిన రాహుల్ గాంధీ

సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) డైరెక్టర్ ప్రవీణ్ సూద్ పదవీకాలాన్ని కేంద్ర ప్రభుత్వం మరో ఏడాది పాటు పొడిగించింది. మే 24, 2026తో ముగియనున్న ఆయన పదవీకాలాన్ని 2027 మే వరకు పొడిగిస్తూ కేబినెట్ నియామకాల కమిటీ (ఏసీసీ) బుధవారం ఉత్తర్వులు జారీ చేసింది. ప్రవీణ్ సూద్‌కు ఇది రెండోసారి లభించిన పొడిగింపు కావడం గమనార్హం.

ప్రధాని నరేంద్ర మోదీ నేతృత్వంలో, భారత ప్రధాన న్యాయమూర్తి సూర్య కాంత్, లోక్‌సభ ప్రతిపక్ష నేత రాహుల్ గాంధీ సభ్యులుగా ఉన్న ఉన్నతస్థాయి సెలక్షన్ కమిటీ చేసిన సిఫార్సుల మేరకు ఏసీసీ ఈ నిర్ణయం తీసుకుంది. అయితే, ఈ పొడిగింపును రాహుల్ గాంధీ తీవ్రంగా వ్యతిరేకించారు. ఎంపిక ప్రక్రియపై ఆయన అసమ్మతి వ్యక్తం చేస్తూ ఒక లేఖ కూడా సమర్పించారు.

ఈ ప్రక్రియ పక్షపాతంగా మారిందని రాహుల్ ఆరోపించారు. "మీ ప్రభుత్వం సీబీఐని రాజకీయ ప్రత్యర్థులు, విమర్శకులను లక్ష్యంగా చేసుకోవడానికి పదేపదే దుర్వినియోగం చేసింది. ఈ పక్షపాత ప్రక్రియలో పాల్గొని నా రాజ్యాంగ బాధ్యతను నేను వదులుకోలేను. అందుకే ఈ నిర్ణయంపై నా తీవ్ర అసమ్మతిని తెలియజేస్తున్నాను," అని రాహుల్ తన లేఖలో పేర్కొన్నారు. అభ్యర్థులకు సంబంధించిన కీలక సమాచారాన్ని తనకు అందించకుండా ఈ ప్రక్రియను ఒక తంతుగా మార్చారని ఆయన ఆక్షేపించారు.
 
1986 కర్ణాటక కేడర్ ఐపీఎస్ అధికారి అయిన ప్రవీణ్ సూద్, మే 2023లో రెండేళ్ల కాలానికి సీబీఐ డైరెక్టర్‌గా నియమితులయ్యారు.